Exposicións de fotografía - Via Auria

"A cor viaauria", de Juan Rúa.

Participia actualmente no certame do "Outono Fotográfico" .

Organizado pola Concellaría de Cultura do Concello de Maceda e dentro do certame de Outono Fotográfico.

No Salón Multiusos de Maceda do 17 ao 30 de novembro en horario de 16:00 h. a 20:00 h. de luns a venres.

No Centro Comarcal da Cañiza en decembro e xaneiro.

Na libraría Eixo de Ourense, en febreiro.

"Hai moitas cores: verde, azul, encarnado... Pero a todas elas temos que engadir agora unha nova: a cor vía auria.

Vía Auria é un grupo de xente que se xunta unha vez ó mes para ir a camiñar, para coñecer a terra galega facendo "sendeirismo cos cinco sentidos".

Pero Vía Auria é moito mais que iso.

Vía Auria é tamén algo así como unha escola filosófica, unha universidade ambulante. A súa filosofía aséntase no amor e o respecto á terra e a todos os seres que viven nela: xa sexan plantas, pedras, homes ou animais. Coñecer os camiños e sendeiros de Galicia, os nomes das plantas e das árbores... Descubrir lugares, pobos, montes, covas, fontes, regatos, muíños... Coñecer e amar a natureza, a arte, e toda a fermosura que garda, amosa ou esconde a nosa terra galega. Aprender camiñando e camiñar aprendendo.

Vía Auria é tamén un grupo de amigos que se xuntan unha vez ó mes para pasar o día xuntos, para gozar da natureza, do aire puro, e tamén da sorriso, da ledicia, e da amizade dos compañeiros.

Esta exposición é unha pequena escolma de miles de fotos feitas nas andainas de Vía Auria. E nelas inténtase amosar algúns dos matices desta nova cor: a cor víaauria". Juan Rúa, 2008.