Un pouco máis adiante, un anaco da nosa Historia agóchase á espreita, entre abundante e desordeada vexetación: restos dunha torre de homenaxe, un dobre recinto amurallado, numerosas estructuras de habitación… Estamos, nada menos, que no recinto amurallado do Castelo de Castro Covadoso. Pertenceu ó Conde de Ribadavia. Disque a súa antigüidade se remonta ó s. XII e que pervive ata o s. XVIII, última data da que temos noticia. Tal foi a súa importancia, mesmo económica, que contaba con Feira propia.

Bordeando o Castelo, baixaremos un camiño que, chegado un momento, pasa baixo unha gran tubería de auga. Avanzamos sobre un enlousado posiblemente de época medieval. A pouca sensibilidade que teña o camiñante, as súas retinas impresionarán a garrida puente medieval que agora invita a escoitar tódala musicalidade dun Arenteiro que semella alegrarse coa nosa presencia.

Deixamo-la ponte voltando sobre os nosos pasos e regresamos polo camiño no que atopamo-la tubería de auga. Partindo da entrada do Castelo, atopamos unha bifurcación, máis ou menos a 400 m . É decir, nós chegamos polol camiño da dereita e agora collemo-lo da esquerda, que nos levará ó pobo de Paradela.

Paradela domina o curso baixo do Arenteiro e a súa unión co Avia. Aqui podemos admirar unha fermosa adega do s. XVI, rodeada de cornisa con medias esferas e cunha fiestra en dirección ó oeste que presenta un cáliz e decoración gótica. Este pobo elexíuno como residencia o cineasta José Luis Cuerda ("A lingua das bolboretas ").

Seguimos camiñando cara Moldes, berce e última morada do senlleiro historiador e arqueólogo Chamoso Lamas así como do precursor do Grupo Nós, Antón Losada Diéguez.